Акафисты Великомученице Параскеве Пятнице совершаются в нашем храме по четвергам в 17:00 еженедельно за исключением дней, когда по расписанию стоит иное вечернее Богослужение.

АКАФИСТ

СВЯТОЙ ВЕЛИКОМУЧЕНИЦЕ ПАРАСКЕВЕ

КОНДАК 1

Избранной Богом от рода благочестнаго Иконийскаго града, премудрой и всехвальной Невесте Христовой, яко избавльшеся тобою от искушений и бед, благодарственная пения восписуем Ти,  молитвенницы твои, многострадальная мученице Параскево, ты же, имея дерзновение ко Господу, от всяких нас бед свободи да зовем ти:

Радуйся, Параскево, Невесто Христова всехвальная.

ИКОС 1

Ангелом чистоте подобящися, девственною добротою возсияла еси, святая великомученице Параскево, в Небесные дворы ко Христу Жениху последовала еси; услыши нас, со умилением и радостию вопиющих ти:

Радуйся, отроковице, на страдание Богом призванная,

Радуйся, силою свыше укрепленная;

Радуйся, благодатию Духа Святаго освященная,

Радуйся, от скверны плотския очищенная;

Радуйся, самому Христу, Небесному Жениху себя вручившая,

Радуйся, земныя радости отвергшая;

Радуйся, яко оград цветы благовонныя,

Радуйся, крин, благоухающий вонями добродетельными;

Радуйся, ангельскую чистоту стяжавшая,

Радуйся, смрад страстный отгнавшая;

Радуйся, кровию ризы своя убелившая,

Радуйся, на кресте мирския страсти разорившая;

Радуйся, Параскево, Невесто Христова всехвальная.

КОНДАК 2

Видяще ангели и архангели плотию тя страждущую, страстотерпице Христова Параскево, радостию и веселием глаголющи, яко дева на земли Господа прославиша, вопиющи Ему: Аллилуия.

ИКОС 3.

Разум неуразуменный о Единем всея твари Творце разумети, святая Параскево, богатство земное оставила еси, Христа Жениха своего возлюбивши воистину последовала Ему; тем же мы, таковому разуму дивящеся, глаголем:

Радуйся, премудрая дево, во свете веры ходившая,

Радуйся, Христа Бога паче всего возлюбившая;

Радуйся, мудрецов мира всего мудрейшая,

Радуйся, истины свет разумевшая;

Радуйся, неверныя светом веры просветившая,

Радуйся, жрецов и кумиров их посрамившая;

Радуйся, ангельскии ликостояния возвеселяющая,

Радуйся, демонские лукавствия отгоняющая;

Радуйся, свет лица Божия на Небесех зрящая,

Радуйся, надеждою сердца верных веселящая;

Радуйся, звездо утренняя свет озаряющая,

Радуйся, мрак неведения разгоняющая;

Радуйся, Параскево, Невесто Христова всехвальная.

КОНДАК 3.

Силою Христовою соблюдаема, всеславная мученице Параскево, болезни телесныя небрегла еси и к подвигом мужеским смыслом укрепившися, немощь женскую отвергла еси, взошла еси на крест мучения, вопиющи Богу: Аллилуия.

ИКОС 3.

Имущи, святая Параскево, совершен разум, чистотою девства возсияла еси; добродетелей светлостьми просвещаема и мучения светом украшаема, на враги и на страсти непобедимо ополчившися; такоже и мы вопием:

Радуйся, премудрая Параскево, свещу неугасиму имущая,

Радуйся, на брак Агнчий радостно текущая;

Радуйся, девства нетленнаго источнице,

Радуйся, всем притекающим к тебе помощнице;

Радуйся, яко чувства твоя от плоти мира сохранила еси,

Радуйся, яко единаго Христа в сердце носила еси;

Радуйся, истинная Христовых страстей причастнице,

Радуйся, тезоименитая Пятнице;

Радуйся, с мудрыми девами в чертог Небесный входящая,

Радуйся, венцем славы Небесней венчаемая;

Радуйся, яко тобою идольская лесть отгоняется,

Радуйся, яко тобою вера Христова утверждается;

Радуйся, Параскево, Невесто Христова всехвальная.

КОНДАК 4.

Бурю тяжких искушений воздвигоша врази противу тебе, святая Параскево; ты же от своих кровей трудолюбно чашу страданий испила еси, желающе по Христе, Женисе твоем, во след потещи, яко ластовица доброгласная, песнь воспевая: Аллилуия.

ИКОС 4.

Слышавше беззаконныя веления злочестиваго Диоклетиана царя, гонящаго христианы, ты, святая Параскево, нечестивому игемону на муку предана бывше, радостию раны претерпела еси и сладкую смерть прияла еси. Мы же, подвигом твоим дивящеся, воспеваем сице:

Радуйся, многострадальная Параскево, беззаконными осужденная,

Радуйся, благодатию Божиею укрепленная;

Радуйся, жертво благоуханная,

Радуйся, вено страданий благовонное;

Радуйся, непорочная страдалице,

Радуйся, верных заступнице;

Радуйся, девственною добротою возсиявшая,

Радуйся, путь неверным показавшая;

Радуйся, праведная обличительнице,

Радуйся, нечестия разорительнице;

Радуйся, славы Небесныя присно желающим ходатаице,

Радуйся, о нас к Богу молитвеннице;

Радуйся, Параскево, Невесто Христова всехвальная.

КОНДАК 5.

Боготечную звезду зрящи тя, богомудрая Параскево, человецы удивляшеся: како дева победи врага и Небесным венцем украсившеся непрестанно воспевает Богу: Аллилуия.

ИКОС 5.

Видеша человецы представлену судищу беззаконных тебе, святая Параскево, трепетом одержими ужасахуся и удивляшеся, песньми славяще и кланяющеся страстем твоим; с ними же и мы воспеваем сице:

Радуйся, богомудрая дево, Христовых Страстей обещнице,

Радуйся, Небесных чинов сотаиннице;

Радуйся, лукаваго врага посрамившая,

Радуйся, бесовские полки победившая;

Радуйся, муки радостно подъявшая,

Радуйся, на раны себя отдавшая;

Радуйся, огнем опаляемая,

Радуйся, когтьми железными терзаемая;

Радуйся, от кровей твоих светлую ризу себе исткавшая,

Радуйся, одесную Спаса седящая;

Радуйся, яко тобою от страданий и бед свобождаются,

Радуйся, яко твоими молитвами исцеляются;

Радуйся, Параскево, Невесто Христова всехвальная.

КОНДАК 6

Проповедницей славы Божией явилася еси, доблестная мученице Параскево, егда в темницу на смерть брошенная исцеление получила еси и паче солнца красотою возсияла еси, радостно вопиющи Богу: Аллилуия.

ИКОС 6

Возсияла еси светозарная звезда, обагрившися каплями кровными, страстотерпице Христова Параскево, и Божественною благодатию отгнала еси безбожия тьму, просветивши верныя, чтущия твои доблественные подвиги. Тем же восхваляющетя, усердно вопием:

Радуйся, на кресте подобно Христу пропятая,

Радуйся, в темнице яко в чертозе светом объятая;

Радуйся, ангелом тайнозрительно в наготе своей покровенная,

Радуйся, красотою светозарнаго лика украшенная;

Радуйся, игемона посрамившая,

Радуйся, сердца верных укрепившая;

Радуйся, твердейшая адаманта в терпении,

Радуйся, радостию веры освятившаяся в мучении;

Радуйся, орудиями Христовых страстей исцеленная,

Радуйся, тезоименитой предшественницей своей укрепленная;

Радуйся, яко тобою мученический род утверждается,

Радуйся, яко тобою христианский род возвеселяется;

Радуйся, Параскево, Невесто Христова всехвальная.

КОНДАК 7

Хотящу мучителю игемону желание свое улучити и ласкательными словесы тебе, всехвальная мученице Параскево, от Христа Бога отвратити и идолом поклонитися; они же не терпяще имени Христова падоша и рассыпашася в прах, не ведая пети: Аллилуия.

ИКОС 7

Новую показа безчеловечия ярость лютый игемон, егда видя тя в вере непреклонну, святая Параскево, повеле тя на древе повесившу одрати плоть твою когтьми железными и свещьми горящими опаляти ребра твоя: таковое страдание твое благоговейно похвалами ублажаем сицевыми:

Радуйся, муки сугубые за Христа Бога претерпевшая,

Радуйся, славы Небесней возжелевшая;

Радуйся, жилами воловьими терзаемая,

Радуйся, кровми истекаемая;

Радуйся, идолов посрамившая,

Радуйся, огненною мудростию пламень угасившая;

Радуйся, силу молитвы явившая,

Радуйся, преславными чудесы мир удивившая;

Радуйся, ангелами вознесенная,

Радуйся, видением ликостояния причтенная;

Радуйся, крестом вооружившаяся,

Радуйся, венцем мучения украсившаяся;

Радуйся, Параскево, Невесто Христова всехвальная.

КОНДАК 8

Странное чудо явила еси, всеблаженная Параскево, егда огнь с телеси твоего отскочи и пожже вся жгущие тя, ужасом одержимии и в страхе и трепете бежащии; уверовавшие же вопиющии Богу: Аллилуия.

ИКОС 8

Весь сладчайший Иисус сладость неизреченная тебе бысть, всечудная Параскево, Его бо ради горькия муки терпела еси и сладкую смерть приявши возвеселилася еси. Тем же и мы похвальная восписуем ти пения:

Радуйся, идольскую горесть отвергшая,

Радуйся, райскую сладость приемшая;

Радуйся, мысленная стамно, манну Божию в себе имущая,

Радуйся, верным укрепление несущая;

Радуйся, мудрая пчело, от зловоннаго дыма отлетающая,

Радуйся, в воню благоухания Христова притекающая;

Радуйся, злобы неверных не устрашившаяся,

Радуйся, идолам не поклонившаяся;

Радуйся, Крест яко оружие державное вознесшая,

Радуйся, веру яко щит утвердившая;

Радуйся, томление мучителей победившая,

Радуйся, бесовские коварствия упразднившая;

Радуйся Параскево, Невесто Христова всехвальная.

КОНДАК 9

Всякия страсти угаси и душевные недуги исцели мо­литвами твоими, всехвальная мученице Параскево, приходящих к тебе с любовию и святую память твою празднующих, радостно вопиющих прославившему тя Богу: Аллилуия.

ИКОС 9

 Витийствующий язык не может по достоянию восхвалити подвиги твоя, страстотерпице Христова Параскево, палицами биемая, когтьми железными строгаемая, огнем сожжигаемая, мучительское прещение мужественно попрала еси и твердою верою мнози народи ко Христу привела еси; с ними же и мы ублажаем тя:

Радуйся, кровию страдания Христу Богу уневестившаяся,

Радуйся, страстем Христовым подражавшая;

Радуйся, веры ради жестокия мучения претерпевшая,

Радуйся, от Небеснаго Царя благолепный венец восприявшая;

Радуйся, яко всем верным воспоминание твое пресладко,

Радуйся, яко церкви Христовой имя твое пречестно;

Радуйся, досточудное Ангелом и человеком видение бывшая,

Радуйся, и мучителей своим терпением удивившая;

Радуйся, яко сам Господь призре на твоя страдания,

Радуйся, яко Той возвеличил на тя поругания;

Радуйся, девам доброто и похваление,

Радуйся, мучеником красото и утешение;

Радуйся Параскево, Невесто Христова всехвальная.

КОНДАК 10

Спасти хотя душу о телеси своем небрегла еси, доблестная мученице Параскево, и под меч острый, аки под венец красный с веселием последовала еси; во главу же усекновена бывши славу от руки Живодавца богатно прияла еси, вопиющи Ему: Аллилуия.

ИКОС 10

Стена была еси крепка во исповедании Троицы Единосущныя, мученице святая Параскево, егда на месте скончания твоего Глас с небесе бысть: возрадуйтеся праведнии о Господе, яко мученица Христова венчалася; сего ради похваляем тя:

Радуйся, течение мученическаго пути добре скончавшая,

Радуйся, веру безсмертному Жениху Христу до смерти сохраншая;

Радуйся, сердце свое Господеви отдавшая,

Радуйся, на Небеси в сонме святых Ему пред­ставшая;

Радуйся, за любовь ко Христу мирскую суету презревшая,

Радуйся, славу Христову яве узревшая;

Радуйся, победоносною честию увенчанная,

Радуйся, мучителей злобу поправшая;

Радуйся, христианом крепкое заступление,

Радуйся, верным красото и похваление;

Радуйся, безпомощных защитительнице,

Радуйся, сирых и немощных покровительнице;

Радуйся, Параскево, Невесто Христова всехвальная.

КОНДАК 11

Пение всеумиленное приносим ти, прехвальная мученице Параскево, егда доблественне смерть приявши, молитвенницей за нас предстала еси со ангельскими чинми, воспевающи Богу: Аллилуия.

ИКОС 11

Светозарной свещей видим тя, богоизбранная Невесто Христова Параскево, темнаго греха мрак просвещаеши и на путь спасения наставляеши; мы же по долгу достойно почитающи тя воспеваем сице:

Радуйся, к светлости немерцающего света вознесенная,

Радуйся, к ангельским ликостояниям причтенная;

Радуйся, благовонное смирно, Церковь Христову облагоухающая,

Радуйся, богатныя дары неоскудно подавающая;

Радуйся, чаше черплющая радость,

Радуйся, сосуде, исполняющий Небесную сладость;

Радуйся, мироположнице исцелений неоскудная,

Радуйся, сокровище Божиих даров неиждиваемое;

Радуйся, благодатную росу всем верным источающая,

Радуйся, скорбные сердца утешающая;

Радуйся, Царствия Христова сонаследнице,

Радуйся, славы Божией сопричастнице;

Радуйся, Параскево, Невесто Христова всехвальная.

КОНДАК 12

Благодать от Бога ти дана сохраняти и заступатися за всех, с верою входящих во святый храм твой и почитающих честная твоя страдания, святая мученице Параскево; ты же неоскудно подаеши помощь молящимся тебе и вопиющим благодарственно Богу: Аллилуия.

ИКОС 12

Поем твоя мужественная подвиги, почитаем страдания, хвалим долготерпение, ублажаем святую твою кончину, славим твое в немощном теле непобедимое мужество, им же на земли и на небеси прославилася еси, святая добропобедная мученице Параскево; и в честь твоих победоносных подвигов похвальная восписуем ти сия:

Радуйся, ангельскими чинми в сожительство их любезно причтенная,

Радуйся, на земли песньми почтенная;

Радуйся, с мудрыми девами в Небесный Чертог введенная,

Радуйся, елеем страданий укрепленная;

Радуйся, на смерть препровождаемая во гласе радования,

Радуйся, источающая воды чудес пребогатыя;

Радуйся, яко радость твоя вечна во святых светлостях,

Радуйся, яко слава твоя ширше облака;

Радуйся, страстей победительнице,

Радуйся, веры наставнице;

Радуйся, яко на помощь твою уповаем,

Радуйся, яко тобою жизнь вечную улучити чаем;

Радуйся, Параскево, Невесто Христова всехвальная.

КОНДАК 13

Освятая, премудрая и всехвальная мученице, Невесто Христова Параскево! Всеусердное, крепкое наше моление приими и от всех болезней и лукавых человек озлобления нас избави и от вечных грозных мук твоим предстательством и ходатайством сохрани, да с тобою на земли живи во вечные веки поем Богу: Аллилуия.

Сей кондак глаголи трижды, посем икос 1-й (Ангелом чистоте подобящися…) и кондак 1-й (Избранной Богом от рода…).

Посем:

МОЛИТВА

О святая страстотерпице, великомученице Параскево, приими наша, грешных, моления, притекающих в честный храм твой и молящихся честному образу твоему и имя твое нарицающих; помяни, страстотерпице, о их же дарованиих к Богу при кончине молила еси и Господь дал тебе, яко верней рабе своей, всякому, призывающему тобою имя Божие.

Еще просим тя, моли Христа Бога избавитися нам смиренными молитвами твоими от всяких бед и злых болезней и различных напастей; низложи советы помышляющих злая на души наша и телеса; приими, великомученице Христова, воздыхания наша, преклонися к слезам нашим и моляся Христу Богу не престаи. Да и мы, приимше тобою дерзновение к Богу, глаголем:

Царю, Боже, Отче, Содетелю всяческим, Премудрость и Слово, Троице Божественная, Отче и Сыне и Душе, даждь нам светло торжествующим память страстотерпицы Твоя Параскевы, благодатию Твоею грады христианския и веси сохрани, и да не видят божественных святых церквей осквернение или градом и весем опустение; вся поганыя языцы, хулящие православие, еже разорити святыя Твоя церкви, в них же славится пресвятое имя Твое и попленити люди, работающие Тебе и верующие в Тя и славящие Тя и прибегающие к Тебе; елика христианский род не даждь в разорение, и опустение и плен; сотвори тех немощны пред нами, яве тем показующи, яко Твоею силою и помощию и заступлением твердимся. Даждь нам, в православной вере живущим, мир тверд и союз любовен. И всяк мятеж междоусобный от нас изгони, и неправду изжени, а правду всели; и мздоимных судий обличи, иже неправедно судящим и всяко наси­лие творящим рабом Твоим. И укроти от глада и мора и потопа и труса и огненных запалений, и от всякия язя тлятворящия, могущия нам вред сотворити, сохрани. Предстательством и заступлением всеслав­ной мученицы Параскевы на путь спасения направи, да в мире и тишине будуще, прославим пресвятое великолепое имя дивного во святых своих истиннаго Бога, Отца и Сына и Святаго Духа всегда, ныне и присно и во веки веков. Аминь.

 Величаем тя,  святая страстотерпице

 Христова Параскево, и чтим честная страдания Твоя, яже за Христа

претерпела еси.